聖記之友私日記

行程最後一日全程落狗屎, 一早起身已經無晒mood! 到新宿同朋友t買佢細佬嘅NDS LITE禮物亦空手而回, 最後轉戰原宿, 搞掂佢男友果份先。

本人限時朋友t在20分鐘完成任務, 一計時, 朋友t即如上身一樣狂揀狂掃, 感覺就好似參加定時掃獎品嘅遊戲節目, 好好笑! 之後去南青山揀佢細佬嘅手信! 嗱, 我真係無諗住朝聖架!!! 但就俾我見到garcon靈魂川保久玲女士, 無計啦, 潮人們唔恨我咁多!

不過真係要彈下undercover嘅sales, 個個白鴿眼, 見你攞件大size衫都要等半日, 仲要「喇西」地check下就話無貨, 仲同我地講邊件邊件唔係undercover貨! 使你講咩, 我唔識睇招牌架?! 上次幫朋友j買野時已經好不滿呢間野d人,十個惡劣, 今時今日咁嘅服務態度點得架?我決定自己罷買呢個牌子以示抗議!

話說第一日行程講到我睇中左y's個男裝袋, 其實直到last day都未搵到個好過果款嘅袋, 但又剩番好少時間, 好彩我朋友t體諒, 陪我極速去多轉六本木, 最後梗係一搥定音--即買走人啦! 不過發覺返來之後起碼要去完杭州先有機會用......

同朋友去旅行, 會學識體諒、關心、互相分享、互相幫忙, 比起同屋企人出去, 感覺自己大人d!
其實成日怨幾年前去台灣勁唔好玩, 但又發覺出去旅行最開心就係果次, 因為一路都有朋友q同我喪笑, 忽然又諗起「皮憂」san, 話人有飛蚊症叫人玩眼藥水嘅超騎呢橋, 仲有兩個人去淡水堪稱唔好玩之中最好玩嘅一日......唔知幾時再有機會同成班friend出去呢?

小記: 去日本果幾日, 池袋ISP特價生果係福崗士多啤梨, 當然狂買黎食, 到last night朋友t忽發奇想, 話望住成堆士多啤梨, 好似啱啱擇完生果咁, 大家覺得似唔似?

日本人叫富士山不叫fujiyama, 而係fujisan, 一直都唔知點解, 雖然去完、睇完之後仍然解唔開呢個迷, 可能日本人對富士山嘅迷戀就好似愛情一樣, 就算旁人眼中平凡, 你一旦愛上佢, 佢就係最特別。
一早由新宿出發, 坐個零鐘就到河口湖駅, 發現個湖唔見左, 仲以為自己上當, 收尾知道原來仲要搭一程shuttle先到, 抱住好奇嘅心情, 我同朋友t踏上富士山之旅。
十幾分鐘之後「河口湖」呈現眼前, 應該話係日版「香蜜湖」至啱! 無歐洲湖泊果份靈氣都算, 仲要整左幾隻「鴨仔船」, 夠啦, 大陸都唔興啦, 證明一向走在時代尖"durng"嘅架仔都有失手之時! 以為笨左, 好彩離遠見到有上山纜車搭, 最鍾意坐纜車嘅我梗係死lur朋友t陪我坐啦......終於~見識到富士山吸引人嘅一面, 在天上山望向對面富士山, 帶住白色嘅帽嘅火山, 有一種親切朋友嘅感覺, 難怪佢被卡通化製成多種紀念品, 又唔見太平山被卡通化? 證明果份魅力, 就係佢!

特別鍾意一家大細上到山, 小朋友亂叫亂走咁玩個picture, 好cute、好靚、好希望有朝一日自己都可以有幅咁嘅picture, 又諗起某人同個女同老婆上到來, 個picture都可能係咁......
同朋友t買左售賣機整嘅八爪魚丸, 雖然唔可以話頂級好味, 但好過隱, 對住富士山食野都幾有feel呀!

買完手信食完lunch, 兩人「中左」半個鐘巴士去到山中湖---嘩!正! 未見過咁 「行」嘅湖囉! 真係淨係得個湖, 連「鴨仔船」都慳番, 除左見到一隻巨型天鵝就咩都無, 喂!彭福公園個水池都正過佢啦! 更發現如果miss左十分鐘後班車, 就要再等三個鐘先有車返東京, 呢度順利成章成為我地逗留時間最短嘅景點! 唔係淨係在日本, 我諗全世界我去過嘅景點, 都係呢度留得最「耐」囉, 為左證明自己真有到此一遊, 決定影留幅相, 但死都唔俾自己在相中出現, 因為實在太「娘」! 奉勸所有想去富士山嘅朋友, 想睇景有三個options:
1) 去富士急玩順便睇景
2) 去御殿場shopping果陣不妨在揀靚衫之外抬頭望下個富士山
3) 唔嫌齋睇景太悶就可以去河口湖, 感受下日本人嘅富士山之family life

最攞膽係搭左四個鐘巴士先返到東京, 比去程多一倍有多, 結果lur住要食生果嘅我死要朋友t陪我去左supermarket先...結果朋友t在池袋parco失控多一次買左套「飲衫」, 雖然我之前大力游說佢唔好, 但最後見佢咁鍾意, 一望再望, 都唔好意思啦! 有時在外地見到鍾意嘅野無買, 返來真係會唔開心好耐架!

聽日離開日本, 朋友t要買手信俾屋企人, 我又想去六本木再望下買唔買第一日見到個袋, 發現時間好緊迫, 點算?

JR新宿站出發, 翻過富士山, 經過近兩個鐘頭車程, 抵達我地第三日嘅目的地--御殿場。為左唔令自己失控買太多野, 而又可以有多d時間行, 我地決定定下時間表, 目標兩個半鐘頭之內行晒一個zone先, 初初在gap同nextdoor都好順利達標, 但朋友t之後想去MK睇野, 為爭取時間, 我地開始分頭行事, 我就去左HAKKA, 結果就出事, 兩人進入瘋癲狀態, 首度匯合已經大袋細袋, 再分戰ZUCCA同內衣店時, 信用卡都失守! 結果我就梗係out bug(et)啦, 最慘仲要係到御殿場時懶勁book埋回程時間, 最後因為驚趕唔切, 要搭的士出番巴士站, 天呀!真係估唔到第一次在日本搭的士會在咁嘅情況下發生。不過, 能夠在富士山下shopping, 真係有別於海港城, Times Square同又一城架! 好似成個人都「更」左囉! 最可惜係摩天輪因為強風無開, 錯過欣賞富士山嘅最好方法。

夜晚在新宿食到上次miss左嘅一百yen壽司, 仲有海膽壽司都係200yen咋, 勁抵!又好好味, 果陣猛係度諗: 如果自己可以化身小林尊就好啦!食多十件八件都唔會飽......不過, 仲有好野食嘅, 因為我地終於食到多日來(其實都係三日啫)嚮往嘅酒店附近阿伯傳統拉面呀!

阿伯嘅面檔同簡陋木板搭成, 在客人面前即叫即煮, 熱辣辣香噴噴, 勁sell日本風味, 頓時覺得自己攸緊「活得很滋味」or變身女版「蔡san」, 阿伯仲識講廣東話, 不過只限「拉面」、「六百」同「好味」三句囉, 算啦! 搵食夠使咪得囉。嗱, 阿伯舉晒v字影相絕對係自己pose, 我地無叫過架!

靚嘅野, 通常都好短暫, 櫻花亦係! 朝早去到新宿御苑, 發覺早d起身都抵, 因為片片櫻花包圍住自己嘅感覺, 真係好sweet! (雖然包圍住你嘅人仲多)風一吹, 花瓣如雨散落, 肩上、臂上、髮上、地上, 終於知道咩係真真正正嘅櫻花雨。
呢一刻, 暫時忘記傷痛, 忘記煩惱, 忘記犯過嘅錯, 只係想融入美景, 坐低傾下計, 食下野, 可惜時間太趕, 因為下一站不能錯過--涉谷。
同朋友t一人買左一舊煨蕃薯, 開始「濕平」之征!

可能係中左櫻花毒, 我地開始失控......由disney store掃到GAP, 再由GAP掃到parco, 我買frapbois, 朋友t就買A/T, 我買A/T, 朋友t越級挑戰tsumori chisato, 買下買下, 當然overrun, 連原先plan左嘅淺草都要「決行」, 改去銀座。遇上霉dup dur之事--落大雨, Benoist餅唔再出、朋友m托我地買嘅fancl delux tense up亦無、朋友t細佬落重注以為東京有貨嘅agnes b袋梗係又無啦, 白白浪費兩個幾鐘, 再去上野--> 仲大煱! 是日落雨公園唔著燈, 一地爛櫻在我腳下, 掂! 我會記住你, 以後咪使指意我會再去!

好彩夜晚都有安慰獎, 返到池袋, 搵到間日式大排檔食宵夜, 野食唔可以話好好味, 勝在氣氛一流, 不過奉勸各位若然幫襯記得唔好亂接受free goods, 事關老細醒左碗生雞蛋撈蘿蔔(見上圖)過我地, 埋單時發現貴過我地order所涉及嘅$$, 至今一直懷疑係果碗生雞蛋作怪, 仲要唔好味果下先攞命! (預告聽日會係人生必定要一去再去二去三去......去無限次都得嘅御殿場)

乘坐全日空飛機到東京成田機場, 果然比美國嘅航空公司好好多, 野食好味唔在講, 最重要嘅係佢俾左我一個好大嘅surprise: 我落機竟然見到李澤楷, 無錯!係「電訊仍fall」果個Richard Li李澤楷, 亦即係由form six起一直係我偶像果個小小超, 嘩!不得了,東京之行已經賺左, 再睇到靚景, 買到靚衫都係bonus啦!

講番行程, 甫落機, 朋友t已經好興奮, 坐在電車度見到櫻花已經急不及待攞部dc出黎狂「插」, 可惜被「迷失東京」嘅我掃左少少興, 因為......hehe, 我唔記得左原來上次係在日暮里轉車, 結果今次在上野先至落, 行多左寃枉路, 真唔抵!

夜晚揀在六本木過, 先去毛利庭園睇夜櫻, 講真, 「毛利」「無利」個名都改得幾衰! 不過d夜櫻就真係正到爆, 強力推薦俾所有人, 當然唔少得指定動作mori tower睇夜景啦, 見到東京鐵塔, 忽然諗起伍姑娘n年前一首歌, 好似叫xxxx巴黎鐵塔下 咁上下啦! 娘爆!
呀! 我仲邂逅一個令我在往後幾日都囉囉孿嘅........袋, 勁啱返工用, but係y's for men, 仲要點3000yen, 點呢?買定唔買呢?欲知後事如何, 請看下回分解!